Categoría: NOVAS DESTACADAS

Comunicado da U.A. do Movemento Pensionista: ¡¡¡PAREMOS O XENOCIDIO DE GAZA !!!

NOVAS DESTACADAS, OUTRAS NOVAS, OUTRAS NOVAS - MISCELANEA

26 de maio 2025

Desde hai case 22 meses, o mundo é testigo dun dos maiores crimes da historia recente da humanidade. O pobo palestino, espoliado desde hai décadas pola ocupación colonial en Gaza e Cisxordania, agora é vítima, na Franxa de Gaza, dunha especie de solución final”: un xenocidio en vivo que se desenvolve diante dos nosos ollos, por parte do exército de ocupación israelí, co apoio activo de EEUU e outras potencias occidentais, e a complicidade da maioría dos países árabes da zona. Segundo o reconto oficial de vítimas desta masacre, xa son máis de 55.000 as persoas asasinadas desde outubro de 2023.

Pero a traxedia é, sen dúbida, moito maior do que indican as cifras. Porque as vítimas contabilizadas oficialmente, o son a través dos corpos recuperados, pero non se contan os cadáveres sepultados baixo as ruínas dos edificios e casas bombardeadas (a maioría das existentes). Corpos que non se puideron recuperar nin identificar, polo que a cantidade real de vítimas será con seguridade moi superior, sen dúbida unha cifra de dimensións horribles.

Ademais e especificamente, máis de 20.000 desas vítimas son nenas e nenos (máis de 1.100 menores de 1 ano), o que confire ao monstruoso crime perpetrado polo exército de Netanyahu nun infanticidio planificado, o maior da historia da humanidade que se lembra. Eses miles de vítimas inocentes e indefensas, ademais doutros miles de criaturas mutiladas ou traumatizadas para sempre, converte a traxedia de Gaza nun golpe moral dificilmente soportable para calquera persoa cun mínimo de humanidade e sentimentos.

Tampouco podemos pararnos na mera dimensión cuantitativa das vítimas palestinas. Non esquezamos que cada unha desas persoas asasinadas polo exército sionista era unha vida humana, como a nosa, e tiñan o mesmo dereito á liberdade e a dignidade coma nós, os nosos familiares ou os nosos amigos. Cada un deses nenos e nenas asasinados polas bombas de Israel eran vidas tan preciosas como a dos nosos propios fillos, fillas ou netos. Vidas inocentes, segadas pola barbarie. É dificilmente imaxinable o horror e o sufrimento de quen ve os corpos esnaquizados dos seus fillos e fillas, pero non por iso debemos deixar de tentar poñernos no seu lugar, compartindo a súa dor, aínda que só sexa por un momento. O que está a suceder en Palestina e en Gaza interpélanos a toda a humanidade.

Ninguén de nós podería imaxinar, non fai tanto, que cousas como estas puidesen ocorrer en pleno século XXI, pero están a suceder. Nun marco de destrución total, o exército sionista reduciu a entullos casas, escolas, hospitais, instalacións administrativas ou de servizos básicos, como a auga. Están utilizando a fame, a sede e a falta de atención sanitaria como arma de exterminio. Actualmente hai máis de 15.000 bebés a piques de morrer de fame.

Non podemos mirar cara a outro lado, porque os nosos irmáns e irmás palestinas reclámannolo, e porque por conciencia temos a obrigación de tentar parar o xenocidio. Ademais, ninguén nos garante que a barbarie coa que hoxe se asasina a poboación gazatí e palestina, non poida aplicarse, nun futuro incerto, a quen se opoña aos plans dos poderosos, por exemplo nós mesmas.

Por todo iso, desde os movementos e plataformas pensionistas dos pobos e comunidades do Estado español, esiximos:

  • O fin do xenocidio en curso sobre Gaza, así como que acabe xa a ocupación colonial da terra palestina.

  • A entrada inmediata en Gaza de toda a axuda humanitaria para atender as necesidades máis urxentes: alimentación, auga, atención sanitaria e equipos de emerxencia.

  • A detención e posta ao dispor diante dos tribunais internacionais, dos responsables do goberno e do exército de Israel, autores destes horrendos crimes, empezando polo primeiro ministro Benjamín Netanyahu.

  • Mentres dure o xenocidio, a ruptura total de relacións diplomáticas, comerciais culturais e deportivas co ente sionista. É vital, para deter o masacre, que se leve a cabo un boicot real da subministración de material militar, así como a suspensión do comercio de armas con Israel.

  • Neste sentido, demandamos do Goberno español que acompañe as súas declaracións de boas intencións, que valoramos, con feitos concretos e prácticos, como o inmediato embargo de armas, a cancelación dos contratos de defensa con empresas sionistas, ou a negativa á utilización dos portos do Estado español como escala de material bélico para alimentar o xenocidio sobre Gaza e Palestina.

Desde aquí chamamos ás compañeiras e compañeiros pensionistas para que unamos as nosas forzas e sumémonos ás manifestacións e actividades en solidariedade co pobo palestino, que se están convocando en todos os territorios do Estado. Habemos de conseguir parar o xenocidio en Gaza, e tamén os asasinatos e o espolio en Cisxordania. E que o pobo irmán de Palestina poida decidir o seu futuro en paz e liberdade.

GAZA SOMOS TOD@S!! VIVA PALESTINA LIBRE!!

COESPE (Coordinadora Estatal por la Defensa del Sistema Público de Pensiones)

EHPM (Movimiento de Pensionistas de Euskal Herria)

MADPP (Movimiento Andaluz por la Defensa de las Pensiones Públicas)

MODEPEN (Movemento Galego en Defensa das Pensións e dos Servizos Públicos)

UNIDAD COESPE (Coordinadora Estatal de Pensionistas)

PLATAFORMAS DE PENSIONISTAS de Badajoz, Móstoles…

A UE quere roubarnos as pensións.

MOBILIZACIÓNS, NOVAS DESTACADAS

Modepen acordou adherirse ao manifesto “A UE quere roubarnos as pensións”, asinado tamén por membros da maioría dos países europeos, co obxectivo de adicionalo ás reivindicacións da clase obreira neste 1º de maio de 2025. No mesmo, que achegamos na súa tradución ao galego, constan as seguintes ideas básicas:

Constatar que o sistema público de seguridade social, pensións, sanidade e asistencia médica en Europa, e tamén en todo o mundo, é un dos maiores logros do século XX, supoñendo un importante baluarte de seguridade, cobertura, atención e xubilación para moitas xeracións de traballadores e traballadoras.

Sen embargo observamos como, do Norte ao Sur e do Este ao Oeste de Europa, se está usando a profunda crise do sistema capitalista dos últimos anos para promover a súa privatización. Os gobernos xestores do Capitalismo pretenden así incrementar as ganancias dos grandes grupos empresariais e dos bancos, utilizando feitos reais como a crise económica, a baixa natalidade, o envellecemento da poboación ou os déficits orzamentarios, pero ocultando as verdadeiras causas, que se atopan nas políticas que serven a un sistema baseado na explotación das masas en beneficio dunha minoría insaciábel, sempre en busca de maiores ganancias.

Así vemos como o novo secretario xeral da OTAN, Rutte, e o banqueiro xefe, Draghi, chaman aos gobernos para que realicen cada vez máis recortes na seguridade social, na sanidade e nas pensións. E reclaman que os aforros vaian a engrosar o gasto militar. Ao tempo, preséntannos o Produto Europeo de Pensións Particulares (PEPP) como unha opción para garantir unha xubilación digna e segura cando, en realidade, é un intento de “crear un mercado único de capitais” que despoxe á cidadanía dos seus dereitos sociais para alimentar os beneficios dos grandes fondos de investimento cos que financiar as guerras promovidas pola OTAN e a UE.

Deste xeito pretendese suprimir o carácter social da Seguridade Social, o seu financiamento polos orzamentos públicos, a exención das cotizacións aos empregadores, a privatización dos sistemas de pensións, de saúde e de asistencia médica, o peche de hospitais e centros de saúde públicos, o aumento da idade de xubilación para homes e mulleres, a redución das pensións. En contraste necesitaríase unha longa lista para enumerar todas as reducións de impostos dos últimos anos.

Como persoas xubiladas a experiencia da nosa vida profesional amósanos que nada está dado, que todo se conquista coa loita, unha loita que non é só para nós mesmos senón tamén para os nosos descendentes. Por iso, esiximos:

• Un sistema público exclusivo de seguridade social, saúde, asistencia médica, con prestacións gratuítas.

• O financiamento da Seguridade Social principalmente polos orzamentos dos Estados de todos os países, polos empresarios, con baixa participación das persoas asalariadas.

• A abolición de todas as actividades bursátiles coas reservas de Seguridade Social.

• A abolición de toda privatización de servizos públicos.

• A redución en cinco anos da idade de xubilación para homes e mulleres.

• A creación de residencias públicas que satisfagan as necesidades das persoas xubiladas en cada país.

• O aumento das pensións de xubilación para satisfacer as necesidades básicas, igualando as pensións mínimas ao salario mínimo de cada país.

• Programas públicos, gratuítos e de calidade de asistencia social, recreativa e cultural.

GOBERNE QUEN GOBERNE, AS PENSIÓNS DEFÉNDENSE

TEXTO PARA ADICIONAR, O 1 DE MAIO DE 2.025, ÁS REIVINDICACIÓNS DA CLASE OBREIRA EUROPEA:

Modepen apoia a manifestación de SOS Sanidade Pública en Compostela o 06-04-2025.

MOBILIZACIÓNS, NOVAS DESTACADAS, OUTRAS NOVAS, OUTRAS NOVAS - MISCELANEA

Por terceiro ano consecutivo SOS Sanidade Pública convoca a todos/as os/as galegos/as a saír á rúa o vindeiro 6 de abril, ás doce horas, en Compostela1 esixindo “MÁIS SANIDADE PÚBLICA”.

Desde Modepen apoiamos esta convocatoria porque, como deciamos hai practicamente un ano, “a Sanidade Pública Galega segue en coma, na última fase do seu desmantelamento” e porque segue a ser necesaria “unha gran mobilización social e profesional para cambiar esa situación aberrante e inaceptábel”.

Este ano a convocatoria céntrase nos seguintes puntos:

MÁIS ATENCIÓN PRIMARIA

Centros de saúde e PAC dotados de persoal suficiente de todas as categorías, ben equipados, accesibles en 24-48 horas máximo, con consultas presenciais a solicitude do paciente. Reorientar a Atención Primaria á promoción, prevención, traballo comunitario e a participación social. Garantir o modelo de Atención primaria con especialistas de pediatría nos centros de saúde. Reforzar a capacidade da Atención Primaria de dar resposta aos problemas de saúde mental coa presenza da psicoloxía clínica.

MÁIS ATENCIÓN HOSPITALARIA

Utilización plena dos recursos instalados en hospitais mañá e tarde. Recuperar os recortes nos hospitais comarcais. Acabar coa política de concertación coa privada e restitución ao sistema público dos centros privatizados. Plans para reducir listas de espera e a rematar coa ocultación das mesmas. Reforzar as unidades de saúde mental tanto de adultos como infanto infanto-xuvenil. Acabar coa precariedade laboral do persoal. Esixencia da dedicación exclusiva ao persoal médico.

MÁIS SANIDADE PÚBLICA

Incrementar o orzamento sanitario público. Elaborar un Plan de Saúde Galego que adapte os recursos ás necesidades. Recuperar os servizos privatizados e as áreas sanitarias pechadas. Potenciar a Saúde Pública para combater os riscos e as epidemias para a saúde.

A “Lei Mordaza”, agora tamén contra @s pensionistas NON LLES DÁ VERGOÑA?

NOVAS DESTACADAS, OUTRAS NOVAS - EN POLEIRO ALLEO

28 de marzo 2025

            A Delegación do Goberno en Madrid abriu expediente sancionador con multa de 1.200 euros a un compañeiro do movemento pensionista. O motivo? Este compañeiro foi unha das dúas persoas que comunicaron á mesma Delegación do Goberno, en cumprimento da normativa vixente, a convocatoria dunha manifestación unitaria en defensa das pensións públicas, o 22 de maio do ano pasado. Segundo a policía, nesa manifestación alterouse “ a orde pública”, aínda que ninguén lembra como. Tampouco houbo detidos nin identificados por eses supostos feitos.

Así pois, entendemos que esa sanción administrativa, dez meses despois dunha manifestación legalmente convocada e sen incidentes é, sinxelamente, un castigo colectivo cara a todo o movemento pensionista, utilizando unha lei represiva, para tentar afogar a súa voz.

Pero non é o único caso de pensionistas sancionados pola “Lei Mordaza”. Tamén foron sancionadas o ano pasado dúas compañeiras de Alcalá de Henares, nunha concentración pensionista de “os luns ao Sol”, por exhibir unha pancarta denunciando o xenocidio contra o pobo palestino. Parece que non foi do agrado do policía de quenda, que tentou reprimir ese acto. Outra arbitrariedade máis, que se suma á longa lista de miles de multas sen máis probas que a versión policial. Os movementos cidadáns, as protestas da xente traballadora e, agora tamén, as persoas pensionistas, son o obxectivo da “Lei Mordaza”, que este 30 de marzo cumpre 10 ANOS!

Din que “o prometido é débeda”. As promesas da derrogación da “Lei Mordaza”, feitas en campaña electoral polos dous socios do actual goberno, tanto PSOE como SUMAR, son parte dunha débeda que o actual goberno, que se di “progresista”teñen cos seus propios votantes, pero tamén coas xentes traballadoras, pensionistas e o conxunto da cidadanía. Cada día que pasa sen derrogar esa lei represora debería encherlles de vergoña, pola covardía de non cumprir coa súa palabra e optar pola vía autoritaria. Deberían ruborizarse se, ademais, segundo datos do seu propio Ministerio do Interior, a maior parte das multas impostas nestes dez anos fórono baixo o mandato deste goberno supostamente “de esquerdas”. Agora que tamén se nos ameaza desde o Ministerio de Defensa, con enormes aumentos dos gastos militares a cargo das necesidades sociais, é pertinente lembrarlles que o autoritarismo e o militarismo son a peor cara do capitalismo.

Tomamos boa nota de que as multas contra as e os compañeiros pensionistas son contra todo o colectivo, e o son por defender as pensións públicas e a liberdade de expresión.Tamén somos e seremos solidarias con todas as persoas vítimas deste Estado autoritario e das súas leis represivas. Non podemos esquecer, entre outros casos, aos 6 de Zaragoza, nin ás sindicalistas da Suíza de Xixón ou do SAT de Granada. Agora,tamén, chamamos á solidariedade das xentes traballadoras e pensionistas cos nosos compañeiros represaliados de Madrid e Alcalá de Henares. As organizacións e os movementos de pensionistas dos diferentes pobos e comunidades que firmamos este escrito, temos moi claro aquilo de que “se nos tocan a un@, tócannos a tod@s”.

Esiximos ao Goberno e aos grupos políticos que lle apoian, a que procedan inmediatamente á DERROGACIÓN DA LEI MORDAZA.

GOBERNE QUEN GOBERNE, AS PENSIÓNS E OS DEREITOS DEFÉNDENSE

COESPE (Coordinadora Estatal por la Defensa del Sistema Público de Pensiones)

EHPM (Movimiento de Pensionistas de Euskal Herria)

MADPP (Movimiento Andaluz por la Defensa de las Pensiones Públicas)

MODEPEN (Movemento Galego en Defensa dás Pensións e dos Servizos Públicos)

UNIDADE COESPE (Coordinadora Estatal de Pensionistas)

PLATAFORMAS DE PENSIONISTAS de Badajoz, Móstoles…

EVOLUCIÓN DA BRECHA DE XÉNERO NAS PENSIÓNS DE XUBILACIÓN (1977-2024) – PERSPECTIVAS DE FUTURO – POR XABIER PÉREZ DAVILA

NOVAS DESTACADAS, PENSIÓNS

Cando se achega o 8 de marzo facemos público esta análise sobre a brecha de xénero nas pensións de xubilación elaborado polo noso compañeiro Xabier Pérez Davila.

Cada mes as mulleres perciben en concepto de pensións de xubilación menos da metade do que perciben os homes. Esta enorme brecha débese á que nas décadas anteriores a taxa de ocupación das mulleres era moi inferior á dos homes e a que percibían salarios máis baixos.

Actualmente a taxa de ocupación feminina é 10 puntos inferior á dos homes e parece difícil que se reduza coas políticas ao uso.

A creación de un sector público dos coidados sería o mecanismo máis rápido para pechar polo menos parte da brecha de xénero na ocupación, os salarios e, polo tanto, as pensións futuras de xubilación. Un servizo público de axuda á autonomía e á dependencia criaría emprego con salarios e condicións de traballo dignos que contribuirían a avanzar no peche das brechas.

A experiencia dos países nórdicos pode servir de exemplo.

Documento: EVOLUCIÓN DA BRECHA DE XÉNERO NAS PENSIÓNS DE XUBILACIÓN (1977-2024) – PERSPECTIVAS DE FUTURO – POR XABIER PÉREZ DAVILA

Nota de prensa da Unidade de Acción das plataformas e movementos de Pensionistas de Pobos e Comunidades do Estado do 12/02/2025

NOVAS DESTACADAS, PENSIÓNS

12 de febreiro de 2025

Hoxe día 12 de febreiro sométese a votación no Congreso o RDL 1/2025 no que se inclúe a revalorización das pensións, así como outras medidas que forman parte do denominado escudo social.

Hoxe tal como os partidos políticos anunciaron se ratifica o incremento das pensións previsto na Lei 21/2021.

Con todo, as plataformas e movementos de pensionistas abaixo asinantes reiteramos a nosa indignación polo mal trato escenificado no Congreso dos Deputados: o incumprimento da lei contra un dereito fundamental, como a revalorización das pensións. Isto é algo que nunca máis debe repetirse, e esiximos aos partidos políticos plenas garantías para que así sexa.

Valoramos positivamente os apoios de todo tipo que recollemos estes días, e que a nosa esixencia sexa atendida. Nesta ocasión, a resposta que demos en todos os territorios do estado a unha medida que nos levaba de volta a 2018 foi necesaria para que un ataque ás pensións públicas desta natureza non se producise e conseguimos impedir que traspasasen unha liña vermella infranqueable. A mobilización, unha vez máis, foi a garantía para conseguiras as nosas reivindicacións, e facer rectificar a quen tentou vulnerar os nosos dereitos.

Queremos deixar claro que calquera intento de volver á situación anterior a 2018 é totalmente inaceptable e reafirmamos a nosa decidida vontade de saír á rúa para impedilo.

Conseguimos que se revaloricen as pensións, pero moitas reivindicacións urxentes e imprescindibles seguen vixentes e por iso imos seguir mobilizándonos o tempo que sexa necesario para conseguilas.

Hoxe tamén denunciamos de novo que no pleno do día 22 de xaneiro e nesa ocasión cos votos do PP sumados aos do PSOE, Sumar, ERC, PNV, CC e UPN, apróbasese o decreto 11/2024, (dando paso á tramitación de lei do decreto, no último momento) que pretende compensar baixos salarios e pensións compaxinando traballo e pensión mediante o aumento da idade de xubilación que pode chegar ata os 72 anos.

Esta lei, aínda que se di voluntaria, atrasará a idade de xubilación, en especial ás persoas con peores traballos (na súa maioría, mulleres), salarios e pensións ata equiparar idade de xubilación con esperanza de vida. Este decreto tamén supón para a mocidade retardar e dificultar a súa incorporación ao traballo, e fomenta a precarización das súas condicións laborais. Como xa dixemos no noso comunicado do 5 de agosto de 2024, isto tamén é inaceptable.

Por iso, seguiremos na rúa como o vimos facendo desde fai máis de sete anos, defendendo o Sistema Público de Pensións contra os intentos de privatlzación, opoñéndonos á prolongación da idade de xubilación, voluntaria ou non, esixindo o cumprimento da lei e a consecuente realización da auditoría das contas da Seguridade Social e a mellora substancial dos salarios, impedindo a perda de poder adquisitivo para garantir a dignidade das pensións públicas.

GOBERNE QUEN GOBERNE, AS PENSIÓNS PÚBLICAS E OS

DEREITOS SOCIAIS DEFÉNDENSE!

COESPE (Coordinadora Estatal por la Defensa del Sistema Público de Pensiones)

EHPM (Movimiento de Pensionistas de Euskal Herria)

MADPP (Movimiento Andaluz por la Defensa de las Pensiones Públicas)

MODEPEN (Movemento Galego en Defensa das Pensións e os Servizos Públicos)

UNIDAD COESPE (Coordinadora Estatal de Pensionistas)

PLATAFORMAS DE PENSIONISTAS de Badajoz, Móstoles…

Nota de prensa da unidade de acción das plataformas e movementos de pensionistas de Pobos e Comunidades do Estado.

NOVAS DESTACADAS, PENSIÓNS

3 de febreiro de 2025

Tras coñecer que novamente está en vigor o incremento das pensións para 2025 así como outras medidas que forman parte do denominado escudo social deixamos sen efecto, de momento, as mobilizacións que anunciaramos no caso de que non se houbera reconducido a situación creada o pasado día 22 de xaneiro.

Con todo, as plataformas e movementos de pensionistas abaixo firmantes reiteramos a nosa indignación polo mal trato escenificado no Congreso dos Deputados: o incumprimento da lei contra un dereito fundamental, como a revalorización das pensións. Isto é algo que nunca máis debe repetirse, esiximos aos partidos políticos plenas garantías para que así sexa.

Valoramos positivamente os apoios de todo tipo que recollemos, e que a nosa esixencia fose atendida. Nesta ocasión, o facer pública a convocatoria de manifestacións masivas, a nivel de todos os territorios do Estado, conseguiu impedir que traspasasen unha liña vermella infranqueable. A mobilización, unha vez máis, foi a garantía para conseguir as nosas reivindicacións, e facer rectificar a quen tentou vulnerar os nosos dereitos. Queremos deixar claro que calquera intento de volver á situación anterior a 2018 é totalmente inaceptable e reafirmamos a nosa decidida vontade de saír á rúa para impedilo.

Denunciamos tamén que nese mesmo pleno do día 22 de xaneiro e nesa ocasión cos votos do PP sumados aos do PSOE, Sumar, ERC, PNV, CC e UPN, aprobásese o decreto 11/2024, que pretende compensar baixos salarios e pensións compaxinando traballo e pensión mediante o aumento da idade de xubilación que pode chegar ata os 72 anos.

Esta lei, aínda que se di voluntaria, atrasará a idade de xubilación, en especial ás persoas con peores traballos (na súa maioría, mulleres), salarios e pensións ata equiparar idade de xubilación con esperanza de vida. Este decreto tamén supón para a mocidade retardar e deificultar a súa incorporación ao traballo, e fomenta a precarización das súas condicións laborais. Como xa dixemos no noso comunicado do 5 de agosto de 2024, isto tamén é inaceptable.

Por iso, seguiremos na rúa como o vimos facendo desde fai máis de sete anos, defendendo o Sistema Público de Pensións contra os intentos de privatización, opoñéndonos á prolongación da idade de xubilación, voluntaria ou non, esixindo o cumprimento da lei e a consecuente realización da auditoría das contas da Seguridade Social e a mellora substancial dos salarios impedindo a perda de poder adquisitivo para garantir a dignidade das pensións públicas.

GOBERNE QUEN GOBERNE, AS PENSIÓNS E OS DEREITOS DEFÉNDENSE!

COESPE (Coordinadora Estatal por la Defensa del Sistema Público de Pensiones)
EHPM (Movimiento de Pensionistas de Euskal Herria)
MADPP (Movimiento Andaluz por la Defensa de las Pensións Públicas)
MODEPEN (Movemento Galego en Defensa das Pensións e dos Servizos Públicos)
UNIDADE COESPE (Coordinadora Estatal de Pensionistas)
PLATAFORMAS DE PENSIONISTAS de Badajoz, Móstoles…

Ligazón ao documento Comunicado de U.A. 03-02-2025

Susto e aviso.

NOVAS DESTACADAS, PENSIÓNS

Estamos lendo o comunicado da Unidade de Acción (UA), que enlazamos, cando moitos de nós aínda temos o susto no corpo. Ao carallo a actualización das pensións deste ano!!!!. Ese 2,8% para as pensións contributivas, 6% para as pensións mínimas e as non contributivas e 9% para o Ingreso Mínimo Vital. E, o máis preocupante, a conciencia (os que aínda non eran, ou éramos, conscientes) de que están en perigo, que calquera goberno, con calquera desculpa (ou sen ela) pode tirar ao lixo o “incremento segundo o IPC”. Este ano ou calquera ano.

Este 22 de xaneiro quedará marcado como o día do susto aos pensionistas (houbo máis “trasacordos” graves, mais, agora, nós estamos a falar das pensións). Xuntáronse as dereitas: Vox, Junts, PP (xa sabemos como rima) para dar un aviso ao goberno no noso lombo.

E puideron facelo porque, como di o comunicado da UA “As pensións seguen sendo moeda de cambio e non un dereito básico fundamental”.

É un susto e é un aviso, máxime nas vésperas do mes de marzo deste ano cando, como sabemos, toca facer a avaliación da evolución dos gastos e ingresos do sistema de Seguridade Social (disposición adicional 2ª do Real Decreto-lei 2/2023) e adoptar, segundo saia esa avaliación, un aumento dos ingresos, unha redución dos gastos, ou unha combinación de ambos. Un momento “perigoso” á vista da ansia dos nosos banqueiros por xestionar (e cobrar comisións) un sistema privado de pensións. (Ver análise sobre esa DA 2ª i).

Pois ben, Modepén e a UA dámonos por avisados.

Porque “Non imos aceptar nin un só paso atrás nin políticas respecto a as pensións como as adoptadas de 2011 a 2018”. E porque: “Se esta cuestión non está resolta satisfactoriamente antes do 20 de febreiro deste ano, o día 22 sairemos á rúa como o fixemos en xaneiro de 2018”.

Non imos aceptar nin un só paso atrás.

Modepen dá a benvida a Asociación Galega na Defensa do Sistema Público de Dependencia e Discapacidade (ASGADeD)

NOVAS DESTACADAS, OUTRAS NOVAS, OUTRAS NOVAS - EN POLEIRO ALLEO

En rolda de prensa deste martes 14 de xaneiro presentouse a Asociación Galega na Defensa do Sistema Público de Dependencia e Discapacidade (ASGADeD) constituída por un grupo de persoas de diversas contornas sociais e profesionais.

Denuncian que, por unha banda, a Xunta de Galiza aposta por converter o Sistema Público Galego de Dependencia nun Sistema de Beneficencia “Low Cost”, como demostra a baixa intensidade dos servizos, as ínfimas contías das prestacións económicas e o seu claro infra-financiamento, a preferencia pola “Prestación Económica de Coidados no Entorno Familiar (PECEF)” en detrimento do SAF (Servizo de Atención no Fogar) ou pola enorme escaseza de residencias públicas.

E por outra banda constatan como a Xunta de Galiza favorece descaradamente a privatización do sistema da dependencia, que xa conta cunha forte presenza de Fondos de Investimento estranxeiros (“fondos voitre”), que unicamente buscan a maximización de beneficios e non o correcto coidado das persoas en situación de dependencia. Neste sentido lembran que o Estado español só dedica aos servizos sociais o 0,8% do seu PIB, mentres que a media da Unión Europea é do 1,6% chegando nos Países Nórdicos a máis do 3%.

ASGADeD traballará para modificar a realidade antes descrita mediante a construción dun movemento social forte, amplo, plural e transversal, que mobilice á sociedade galega para exixirlle ás administracións públicas un compromiso real cuns servizos sociais da dependencia e discapacidade de calidade e de financiamento, titularidade, xestión e provisión 100% públicas. Un servizos que permitan “Envellecer na casa”, prestando servizos de proximidade (Servizos de Axuda no Fogar, Centros de Día, Tele-asistencia, …) que adíen o momento do ingreso nun Centro Residencial.

E por isto ASGADeD reivindica:

-Uns servizos sociais de dependencia de cobertura universal e gratuítos.

-Un financiamento adecuado polas administracións públicas.

–A realización das inspeccións pertinentes que garantan a calidade nos coidados ás persoas usuarias.

–Rateos de profesionais adecuados, debidamente formados, e con condicións laborais e salariais dignas.

-Priorizar os servizos formais do SAF, Atención Residencial, Centros de Día, … prestados por profesionais respecto ás prestacións económicas (Vinculada aos Coidados na Contorna Familiar, Vinculada ao Servizo, …) que se basean nos coidados informais prestados desde a contorna familiar por coidadores non profesionais;

-A coordinación cos servizos sanitarios públicos de Atención Primaria, dotándoos dos recursos necesarios.

–Uns servizos abertos á participación das persoas usuarias e dos seus familiares, así como da veciñanza das localidades na que se sitúen ou ás que dean servizos.

Na rolda de prensa comentáronse tamén as últimas decisións que tomou a Xunta, aproveitando as Festas do Nadal, e que amosan a teima privatizadora e precarizadora dos servizos da dependencia:

1) A Orde do 4 de decembro de 2024 (DOG do 13/12/2024) que modifica a Orde do 18 de abril de 1996, afondando nos recortes do persoal sanitario que debe existir nas residencias.

2) A Resolución de 31 de decembro de 2024 (DOG do 02/01/2025) coa que a Xunta:

– Unifica os procedementos da dependencia e da discapacidade sen ampliar os equipos de valoración nin abordar en profundidade a falta de persoal.

– Abre a posibilidade de conveniar a realización dos informes de saúde con mutuas privadas.

– Elimina a obrigatoriedade da realización do Informe Social, debilitando o papel dos e das traballadores sociais e comprometendo a calidade da atención.

– Estabelece a citación da dependencia e da discapacidade a través de mensaxe no móbil, o que non permitirá que as citacións se realicen de forma efectiva.

Finalmente o 26/12/2024 o Presidente da Xunta informou de que os dependentes que teñan recoñecido o dereito á unha prestación da dependencia e están agardando por unha praza pública (nunha residencia ou centro de día, ou por recibir atención no seu domicilio, …,) recibirán unha axuda directa do Goberno galego. Unha “paguiña”, que xa se prometera no 2023, e da que se descoñece o importe e o control da mesma.

Noticias sobre a rolda de prensa:

GaliciaPress: https://www.galiciapress.es/articulo/movimientos/2025-01-14/5137262-nace-asgaded-defensa-sistema-publico-dependencia-beneficios-cuidados-terminos-casan-mal

Nos diario: https://www.nosdiario.gal/articulo/social/nace-entidade-sistema-beneficencia-low-cost-da-xunta/20250114145424214592.html

Xornal Galicia: https://xornalgalicia.com/actualidad/agenda/presentacion-publica-da-asociacion-galega-na-defensa-do-sistema-publico-de-dependencia-e-discapacidade

Galicia Confidencial: https://www.galiciaconfidencial.com/noticia/282779-nace-asgaded-asociacion-defender-sistema-publico-dependencia-calidade-galicia

 

2025: Revalorización das pensións, pero ameazas no horizonte.

NOVAS DESTACADAS, PENSIÓNS

Comunicado da Unidade de Acción.

O comunicado da Unidade de Acción dos Movementos Pensionistas céntrase en:

      1)  O incremento das pensións para 2025.

     2)  A batalla polo relato sobre a suposta crise do sistema de pensións públicas.

     3) A necesidade dunha reforma fiscal.

   4)  A preocupación polo aviso de “autoridades competentes” respecto ao “estado de benestar” incluídas as pensións públicas.

     5)  A necesidade da mobilización.

1) As pensións revalorízanse nun 2,8%, ao aplicar a media do IPC dos doce meses anteriores a decembro de 2024, en lugar do IPC total anual. Isto supón recuperar un 0,4% sobre a inflación anual.

Sobre esta revalorización valórase: Que supón unha vitoria do movemento, pero que, ao tempo, significa unha perda acumulada desde o 2011. Que cómpre empezar o debate do concepto do custe da vida (mencionando o brutal incremento do prezo dos alimentos en relación ao IPC xeral) Que hai un empeoramento relativo das pensións mínimas respecto ao SMI e que non hai noticias sobre a reivindicación da derrogación dos coeficientes redutores da xubilación anticipada con 40 anos cotizados. Por iso reivindícase:

– Recuperar o poder adquisitivo das pensións demandando recuperar a paga compensatoria vixente ata o 2023. (paga compensatoria en xaneiro de 2025 do 4%).

– Equiparar por lei as Pensións Mínimas ao 100% do SMI.

– Derrogar os coeficientes redutores da xubilación anticipada con 40 anos cotizados.

2) Seguimos enfrontando o relato da suposta crise do sistema de pensións públicas. A pesar do informe do Tribunal de Contas, que estimou entre 1989 e 2018 gastos impropios da SS por un valor de 104 mil millóns de euros, do aumento da afiliación até máis de 21 millóns de traballadoras e traballadores e á espera da auditoría da Seguridade Social decidida na lei do ano 2021. A pesar de que hai recursos suficientes para mellorar e manter o sistema público de pensións, debemos estar atentos a marzo de 2025 cando a Autoridade Independente de Responsabilidade Fiscal (AIReF) realizará a primeira avaliación da evolución dos gastos e ingresos do sistema de Seguridade Social. Sabemos que hai forzas interesadas nun resultado negativo desa avaliación (ver: https://www.modepen.org/wp-content/uploads/2024/09/Avaliacion-marzo-2025-Documento.pdf).

3) Esíxese unha reforma fiscal, para que paguen máis os que máis gañan e teñen para garantir os servizos públicos e o investimento produtivo para impulsar un modelo de desenvolvemento social e medioambiental eficiente e xusto. Igualmente é imprescindible unha mellora substancial de salarios e pensións, especialmente dos más baixos, e erradicar a fenda de xénero nos ingresos.

4) A Unidade de Acción observa con preocupación o marco internacional. Menciona as declaracións do novo secretario xeral da OTAN chamando a incrementar o gasto militar á conta de erosionar o gasto social e, explicitamente, as pensións, aínda máis preocupante porque non se escoitan voces contrarias desde as institucións. (https://es.euronews.com/my-europe/2024/12/12/rutte-pide-a-los-ciudadanos-europeos-sacrificios-para-aumentar-el-gasto-en-defensa )

5) Por todo isto a UA fai un chamamento ás persoas pensionistas en particular e á xente traballadora en xeral a preparar unha defensa activa dos nosos dereitos este ano que se abre. A unidade e a mobilización serán máis necesarias ca nunca.

Podemos acceder ao comunicado completo desde aquí.